Այդ ես եմ պատասխանատու այն բանի համար, որ հեռանամ նրանից, ինչն ինձ վերք է հասցնում։ Ես եմ պատասխանատու այն բանի համար, որ պաշտպանվեմ նրանցից, ովքեր ինձ վնաս են տալիս։ Ես եմ պատասխանատու այն բանի համար, որ ուշադրություն դարձնեմ նրան, ինչ ինձ հետ կատարվում է և գնահատեմ կատարվող բաների մեջ իմ մասնակցության չափաբաժինը։
Ես պետք է որոշեմ, թե ինչպես եմ գործելու։ Իմ սահմանափակումներով, իմ դժբախտություններով, իմ տգիտությամբ, այն ամենով, ինչը ես սովորել եմ և ինչը ես գիտեմ։ Այդ ամենը հաշվի առնելով, ես պետք է որոշեմ, թե ինչպես վարվեմ լավագույն ձևով։ Եվ ես հենց այդպես պետք է վարվեմ։
Ես պետք է ավելի լավ ճանաչեմ ինձ, որպեսզի իմանամ իմ ռեսուրսները։
Ես պետք է այնքան սիրեմ ինձ, որպեսզի արտոնություններ տամ ինձ, և իմանամ, որ դա իմ որոշումն է։
Այդ ժամանակ ես ձեռք կբերեմ մի բան, որը բխում է ինքնավարությունից և ազատության հակառակ երեսն է` խիզախություն։ Ես խիզախություն կունենամ, որպեսզի գործեմ այնպես, ինչպես իմ գիտակցությունն է թելադրում, և վճարեմ դրա համար։
Այդ ժամանակ ես ազատ կլինեմ, նույնիսկ եթե դա ուրիշներին դուր չգա։
Եվ եթե դու ինձ չես սիրում այնպիսին, ինչպիսին ես կամ,
Եվ եթե դու լքես ինձ այնպիսին, ինչպիսին ես կամ,
Եվ եթե ձմռան ամենաերկար ու ամենացուրտ գիշերին դու ինձ մենակ թողնես և գնաս…
Փակի՛ր դուռը, լսո՞ւմ ես։ Որովհետև փչում է։
Փակի՛ր դուռը։ Եթե քո որոշումն այդպիսին է, փակի՛ր դուռը։
Ես քեզ չեմ խնդրի նույնիսկ մեկ րոպե մնալ քո ցանկությանը հակառակ։ Ես քեզ խնդրում եմ` փակիր դուռը, որովհետև ես այստեղ ապրում եմ, իսկ դրսում ցուրտ է։
Եվ դա կլինի իմ որոշումը։
Դա ինձ վերածում է անձի, որը մանիպուլյացիաների ենթակա չէ։ Որովհետև ինքնաբավ մարդու հետ հնարավոր չէ մանիպուլյացիա անել, և մենք գիտենք, որ ոչ ոք չի կարող կառավարել նրան։ Որովհետև ինքնաբավ մարդուն միայն այն դեպքում կարելի է ղեկավարել, երբ նա ինքը դա ցանկանա, քանի որ նա անկառավարելի է, դուք չեք տնօրինում նրան։ Այդ նա է ղեկավարում իրավիճակը, նա է կառավարում ինքն իրեն։
Դա նշանակում է հսկայական քայլ կատարել ձեր անձնական պատմության ու զարգացման գործում, դա միանգամայն այլ ապրելակերպ, և, միգուցե, ուրիշներին ավելի լավ ճանաչել է նշանակում։
Եթե դուք իսկապես ինքնաբավ եք, եթե դուք նույնիսկ չնչին չափով թույլ չեք տալիս մանիպուլյացիա անել ձեզ հետ, ապա հավանական է, որ որոշ մարդիկ կհեռանան ձեր կյանքից…
Միգուցե, ինչ-որ մեկը չի ցանկանա մնալ։ Դե ինչ, հարկ կլինի համաձայնվել նաև այդպիսի գին վճարել։ Գին, որը նշանակում է մեր մոտ շրջապատի որոշ դեմքերից բաժանվել։
Եվ պատրաստ լինել տոնելու նոր դեմքերի ժամանումը (հնարավոր է…)
Խորխե Բուկայը արգենտինացի ժամանակակից գրող է, հոգեբան:
Ես հոգեբույժ եմ, այդ պատճառով մտածում եմ, որ գլխավորը ինքդ քեզ ազատություն տալն է լինել այնպիսին, ինչպիսին դու կաս իրականում:
Եվ ոչ մեկին թույլ չտալ քեզ ասել, որ լավ կլիներ, եթե դու ուրիշ լինեիր: Պաշտպանիր քեզ հետ լինելու քո իրավունքը: Ժամանակի ընթացքում դու կհասկանաս, որ դա ոչ թե իրավունք է, այլ հենց այդպես էլ պիտի լիներ: Ինչպե՞ս հասնել դրան:
Հարկավոր է քեզ թույլ տալ լինել այնտեղ, ուր դու ես ուզում լինել, իսկ հետո փորձել նստել այնտեղ, որտեղ քեզ է հարմար: Թույլ տալ մտածել այն, ինչ դու ես ուզում մտածել, ոչ թե սպասել, որ ուրիշը մտածի քո փոխարեն:
Խոսել, երբ ուզում ես, և լռել, երբ ոչինչ չի գալիս մտքիդ: Դա քո իրավունքն է՝ քեզ տալ այդ թույլտվությունը: Թույլ տալ զգալ այն, ինչ դու ես զգում, և զգալ այն ժամանակ, երբ դու ես ուզում:
Զգալ ոչ թե, որ ուրիշն է այդպես զգում: Եվ դադարել զգալ այն, ինչ քեզնից սպասում են շրջապատում:
Եթե դու որոշել ես դա անել, ուրեմն հարկավոր է քեզ թույլ տալ ռիսկի գնալ միայն ու միայն այն ժամանակ, երբ հետևանքների համար վճարելու ես դու: Բայց ոչ մեկը թող քեզ չասի, որ չի կարելի գնալ այդ ռիսկին: Եթե դու ոչ մեկին թույլ չես տալիս խառնվել քո գործերին, դա քո որոշումն է:
Եվ վերջում՝ սա շատ կարևոր է: Հարկավոր է քեզ թույլ տալ կյանքում լինելու այն, ինչ դու ես ուզում, ոչ թե սպասել, երբ ուրիշները քեզ կտան այդ թույլտվությունը: